Drejtoresha e Përgjithshme e Institutit të Shëndetit Publik, Albana Fico, në Konferencën e Komitetit Teknik të Ekspertëve për situatën me pandeminë në vend, tha se dy javët e fundit ka patur një zbritje të lehtë në numrin e infeksioneve.
Megjithatë ajo theksoi se nuk është momenti për vetëkënaqësi, duke bërë apel për respektimin me rigorozitet të masave anti-COVID. Ajo theksoi po ashtu se është vënë re një rritje e infeksionit në grup-moshën 25-43, duke i bërë apel të rinjve për më shumë kujdes.
“Situata është vlerësuar në mënyrë dinamike. Vendin më të rëndësishëm të rasteve të konfirmuara e zë grupmosha 55-64-vjeç. Vihet re që ka një rritje në grupmoshën 25-43 dhe bëjmë apel te të rinjtë të zbatojnë masat. Nga vlerësimi i inciedentës, Gjirokastra është në fillimi, ndjekur nga Tirana dhe më pas Lezha.
Situata për këto dy javë mbetet e qëndrueshme zbritej të lehta që janë për tu parë në vijimësi. Nuk ka vend për vetëkënaqësi, ne jemi akoma në një situatë ku transmetueshmëria është e lartë. Jemi në pikën ku duhet të jemi tejet të kujdesshëm në zbatimin e masave, nga grumbullimet, vendosjen e maskës dhe respektimin e orës policore”, tha Fico.
Ndërsa Drejtuesja e Komitetit Teknik të Ekspertëve, Mira Rakacolli bëri me dije se do të vijojë ora policore pas orës 22:00 dhe kufizimet e tjera.
“Siç shihet situata e epidemisë paraqitet e qëndrueshme në një tendencë e lehtë uljeje. Akoma nuk kemi të dhëna të plota për praninë e virusit anglez në Shqipëri. Mendohet që kjo situatë e qëndrueshme është pasojë e masave të marra.
Do të vazhdojë ora policore pas orës 22:00. Universiteti të vazhdojë edhe për një periudhe 2 javore online. Fluturimet me Britaninë të mbeten të pezulluara deri me 18 janar. Të vazhdojmë të përdorim maskën në të gjitha ambientet, të ruajmë distancimin social”, tha Rakacolli./Bl.Ba/Fjala.al
