Kontrollet për shkak të përmbytjeve në orët e fundit në vend kanë zbuluar një bazë klandestinësh sirian në Vlorë. Rreth 50 persona janë ndaluar nga policia në afërsi të fshatit Poro, buzë lumit Vjosa.
Ka qenë një telefonatë në sallën e policisë Vlorë ku një person ka kërkuar ndihmë. “Gomonia po mbytet, ndihmë”, ajo ka zbuluar klandestinët sirianë.
Pas kësaj telefonate, strukturat e Vlorës së bashku me rojen bregdetare janë vendosur në lëvizje duke shkuar në drejtim të grykëderdhjes së Vjosës dhe shpëtuar gomonen me 50 klandestinët sirianë.
Operacioni për bllokimin e mjetit lundrues dhe më pas për evakuimin e personave në bord, u krye në kushte të vështira atmosferike dhe det mbi 5 ballë.
Personat në bord, mes tyre gra e fëmijë në gomone, u evakuuan nga dy anijet luftarake të Rojës Bregdetare dhe Policia e Shtetit dhe transportohen në drejtim të Triportit, Vlorë.
Struktrurat hetimore të Drejtorisë Vendore të Policisë Vlorë dhe ato të Policisë Kufitare, nën drejtimin e Prokurorisë po vijojnë veprimet për zbardhjen e plotë të kësaj tentative për kontrabandim të migrantëve në rrugë detare dhe vënien para drejtësisë të personave përgjegjës./Bl.Ba/Fjala.al
