Stafi i spitalit “Shefqet Ndroqi” ka reaguar pas skandalit të bërë publik, ku një sanitare i kishte zhvatur 8 milionë lekë vajzës së një pacienteje me Covid.
Tire Alldervishi i ka marrë çdo ditë rreth 5000-6000 lekë vajzës, duke i premtuar se do të kujdesej për nënën e saj, por rezultoi e kundërta.
Reagimi i spitalit
Gjithë personeli shëndetësor i spitalit “Shefqet Ndroqi” ndjehet tejet i lënduar, befasuar nga veprimi korruptiv, ç’njerëzor i sanitares me inicialet T.A dhe dënon me forcë këtë akt të paligjshëm, korruptiv i bërë publik në një emision investigativ.
Ky akt i shëmtuar dhe i papërgjegjshëm nuk mundet kurrsesi të njollosë punën vetëmohuese dhe të jashtëzakonshme të personelit shëndetësor të spitalit “Shefqet Ndroqi”.
Personeli shëndetësor i spitalit duke u distancuar nga ky veprim do të vazhdojë të ofroj me përkushtim shërbimin shëndetësor në kohë dhe me cilësi. Mbas shkarkimit nga puna e sanitares i kërkojmë autoriteteve kompetente të kryejnë hetimin deri në fund të këtij rasti. Personeli i shërbimit shëndetësor ‘Shefqet Ndroqi'”, thuhet në reagimin e spitalit “Shefqet Ndroqi”.
