Këtë javë, Pfizer po shpërndan vaksina në vendet e BE-së dy herë më pak sesa ishte rënë dakord.
Kjo ka shkaktuar pakënaqësi në rritje brenda Bashkimit Evropian.
Rumania do të marrë 50 për qind të sasive të planifikuara këtë javë dhe dërgesat do të rriten gradualisht, në mënyrë që Bukureshti t’I marrë deri në fund të marsit sasitë për të cilat ka rënë dakord.
Një situatë e ngjashme paraqitet në Poloni, e cila mori 176 000 doza të hënën, ose 50 për qind më pak se sa pritej.
Qeveria çeke po ngadalëson gjithashtu fushatën e vaksinimit për shkak të problemeve të prokurimit.
“Ne presim që të ketë një ulje të numrit të vaksinave në tre javët e ardhshme,” u tha gazetarëve ministri i Shëndetësisë, Jan Blatný.
Dorëzimi i vaksinës Pfizer do të reduktohet me 15% këtë javë, dhe me 30% javën e ardhshme.
Edhe Instituti Shëndetësor Danez njoftoi se 50 për qind më pak doza këtë javë do të çojë në një ulje prej 10 për qind në tremujorin e parë.
Zyrtarët në këto vende thonë se ulja e furnizimeve minon përpjekjet e tyre për të zbatuar vaksinimin masiv.
Italia kërcënoi kompaninë “Pfizer” me padi të mërkurën, ndërsa sot, Hungaria miratoi paraprakisht për përdorimin e vaksinavës AstraZeneca dhe vaksinës ruse Sputnik V. Ndërsa Hungaria i bëri thirrje Brukselit të ushtrojë presion ndaj Pfizer për t’iu përmbajtur planit të dorëzimit.
“Ne do të jemi të kënaqur nëse Komisioni Evropian ndërmerr hapa për të siguruar që Pfizer dhe prodhuesit e tjerë të ndryshojnë sasinë e dërgesave sa më shpejt të jetë e mundur,” tha shefi i Shtabit të kryeministrit Gergely Gulyas.
Kanadaja dhe Zvicra gjithashtu kanë pasur probleme për shkak të zvogëlimit të dërgesave të vaksinave Pfizer.
