Një studim ka gjetur një lidhje shkencore mes nivelit të ulët të inteligjencës dhe të atyre që kanë mendime homofobike. Hulumtimet u realizuan nga studiuesit në Universitetin e Queensland, Australi, dhe mbështesin studimet ekzistuese që kanë treguar më herët një lidhje mes inteligjencës së ulët dhe pikëpamjeve paragjykuese.
Sidoqoftë, kjo shënon herën e parë që një lidhje mes inteligjencës më të ulët dhe homofobisë është ekzaminuar në popullata jashtë SHBA-ve. Botuar në revistën ‘Intelligence’, studimi përfshi më shumë se 11.500 australianë.
Ekipi hulumtues analizoi të dhënat nga një sondazh i 2012-s, me pyetje që synojnë të vlerësojnë aftësitë njohëse të të anketuarve, si dhe një sondazh të 2015-s që pyeti të anketuarit në lidhje me mendimet e tyre për të drejtat e barabarta.
Ndër pyetjet e tjera, pjesëmarrësve iu kërkua të vendosnin deklaratën “Çiftet homoseksuale duhet të kenë të njëjtat të drejta si çiftet heteroseksuale” në një shkallë prej 1 (nuk pajtohem aspak) deri në 7 (plotësisht dakord).
Në fund u zbulua se, sa më e ulët të ishte inteligjenca e një personi, aq më shumë gjasa kishte që ata të shprehnin pikëpamje paragjykuese kundër çifteve të të njëjtit seks.
Autorët e studimit shkruan: “Ekzistojnë korrelacione të njohura mes inteligjencës së ulët dhe mbështetjes së qëndrimeve paragjykuese ose jo. Individët me aftësi të ulët njohëse kanë më pak të ngjarë të mbështesin të drejta të barabarta për çiftet e të njëjtit seks”.
Rezultatet sugjerojnë që inteligjenca luan një rol kritik, megjithëse të pavlerësuar, lidhur me paragjykimet.
