Përdorimi i maskave, përfaqëson një nga shtyllat e masave anti-Covid, së bashku me distancimin shoqëror dhe larjen e përpiktë të duarve (me sapun dhe ujë ose një xhel hidroalkoolik).
Sidoqoftë, në fillim të pandemisë Covid-19, këshillat ishin kundër mbajtjes së maskës, me shumë gjasa për të mbrojtur rezervat që do të alokoheshin për personelin shëndetësor.
Në dritën e shumë studimeve që vërtetojnë efektivitetin e këtyre pajisjeve, në thyerjen e zinxhirit të infeksioneve të koronavirusit SARS CoV- 2, mjekët dhe shkencëtarët, javët e fundit, kanë filluar të rekomandojnë përdorimin e maskës së dyfishtë, e cila garanton mbrojtje praktikisht totale kundër pikave dhe aerosoleve të kontaminuara potencialisht.
Një studim i madh mbi këtë çështje, sapo është botuar nga Qendrat për Kontrollin dhe Parandalimin e Sëmundjeve (CDC), një nga rregullatorët kryesorë të shëndetit publik në Shtetet e Bashkuara të Amerikës.
Ekspertët nga Ekipi i Reagimit të Emergjencave Covid-19 dhe Instituti Kombëtar për Sigurinë dhe Shëndetin në Punë, kanë treguar se duke u mbuluar, një maskë kirurgjikale, me një maskë pëlhure (të ashtuquajturat maska të komunitetit), mbrojtja nga aerosoli është më e madhe se 90 përqind.
Siç specifikohet për “New York Times” nga Dr. Linsey C. Marr, një studiues në Departamentin e Inxhinierisë Civile dhe të Mjedisit në Virxhinia, mbulimi i dyfishtë i fytyrës, nuk rrezikon funksionin e mushkërive.
Autorët e studimit të ri, zhvilluan një simulim të ekspozimit ndaj piklave të mëdha dhe të vogla të frymëmarrjes (pikat dhe aerosolet, respektivisht), duke krahasuar efikasitetin mbrojtës të kombinimeve të ndryshme të maskave: pa asnjë maskë; me një maskë kirurgjikale të veshur dobët; me një maskë të komunitetit (në pëlhurë); dhe me një maskë kirurgjikale të mbuluar nga një maskë tjetër pëlhure.
Rezultatet treguan se një model i dobët kirurgjik, ishte i aftë të bllokonte vetëm 42.0 përqind të grimcave, ndërsa kombinimi i modelit të pëlhurës mbi modelin kirurgjik, bllokoi deri në 92.5 përqind të aerosoleve, raporton “Fanpage.it”.
Kur burimi dhe marrësi, ishin të dy të pajisur me maska të dyfishta, ekspozimi kumulativ ndaj aerosoleve të marrësit, u zvogëlua me më shumë se 95 %.
Këto rezultate tregojnë qartë se përdorimi i maskës së dyfishtë mund të zvogëlojë ndjeshëm rrezikun e kontraktimit të COVID-19 dhe përdorimi i këtij sistemi inkurajohet nga ekspertët.
