Një ngjarje e rëndë është regjistruar në qytetin e Fushë-Krujës dy ditë më parë, teksa persona të armatosur kanë hyrë në një lokal dhe kanë dhunuar një të ri.
I riu i cili ka rënë pre e dhunës, quhet Elvis Elezi, banor i lagjes ku ka ndodhur ngjarja. Një vit me parë ka qenë pre e një sulmi me lëndë plasësë, pasi një sasi eksplosivi iu hodh në banesë, por fatmirësisht nuk shkaktoi të lënduar, por vetëm dëme materiale.
I dhunuari ka qenë arrestuar vite më parë për trafik droge në Kroaci, por ka disa vjet që ka dalë nga burgu. Aktualisht është i papunë dhe është prind i një fëmije të vogël.
Kujtojmë se dy ditë më parë në një lokal në lagjen e ‘Bakushe Visha’ të Fushë-Krujës, katër persona të maskuar dhe të armatosur kanë ushtruar dhunë barbare ndaj Elezit.
Nën kërcënimin e armëve ata u kanë kërkuar fillimisht klientëve të lokalit të mos lëvizin, dhe më pas kanë tërhequr të riun në mesin e lokalit duke e rrahur barbarisht me shkop. Pasi e kanë qëlluar disa herë dhe kërcënuar të riun në sy të klientëve, personat e maskuar janë larguar nga lokali.
Elezi pas ngjarjes së ndodhur ka marrë mjekim në spital, pasi ka pasur lëndime të shumta në trup.
