Një 34-vjeçar shqiptar ka përfunduar në prangat e policisë italiane në Taranto pasi në banesën ku jetonte iu gjetën drogë dhe sende të vjedhura.
Policë civilë kishin ditë që mbanin nën vëzhgim lëvizjet e shqiptarit, emër i njohur për policinë e vendit apenin, i cili “komunikonte” me shumë të rinj që njihen si konsumues të rregullt droge, përmes dritares të shtëpisë në Via Veneto, e vendosur në katin përdhes të një ndërtese.
Pas kësaj, forcat lëvizese të policisë vendosën të futen në apartament ku gjetën doza të shumta kokaine, e paketuar dhe e gatshme për shitje, 400 euro cash dhe materiale për paketimin e substancave narkotike.
Ndërkohë në dhomën ngjitur policisë i tërhoqi vëmendjen lehja e një qeni pitbull, i cili qëndronte i kyçur. Pas siguruan kafshën, agjentët arritën të hynin në dhomë dhe gjetën mallra të shumta të vjedhura. Një pjesë e materialit të vjedhur tashmë ishte rikuperuar në ditët e para të shkurtit të kaluar.
Në përfundim të operacionit, 34-vjeçari shqiptar, i identifikuar si Indrit Ibro u arrestua për posedim dhe tregtim të drogës dhe vjedhje.
Të gjitha mallrat e gjetura u dërguan në selinë e policisë ku po zhvillohen hetimet për të zbuluar origjinën dhe për të identifikuar pronarët, raportojnë mediat italiane.
