Një muaj para zgjedhjeve, tensionet politike, duke përfshirë edhe përplasjet fizike, po i japin doza të forta “militantizmi” fushatës dhe ditës së 25 prillit. Përballja politike në vijim dhe si po luajnë palët në kërkim të fitores.
Nga Fernada Cenko
Zyrtarisht nesër nis fushata, por palët e kanë nisur që pa “nisur” me shkelje të Kodit Zgjedhor, pasi ka afër dy muaj që vetëm fushatë bëhet nga të gjithë, të varur e të pavarur. Tensionet dhe përplasjet nuk kanë munguar me boksierë militantë, apo kandidatë për deputetë që u mungon “ringu”, duke shprehur dufin mbi tjetrin, vetëm se mendon ndryshe politikisht. Në Elbasan dhe Fier janë regjistruar disa incidente, por pa shumë pasoja që më tepër se dhimbje nga dhuna fizike tremb klima e krijuar.
Vetë liderët nuk kanë ndihmuar që situatat të zbuten, por duket se janë kandidatët nëpër qarqe të cilët po tentojnë një “marrëveshje të heshtur” për të shmangur sa më shumë konfliktualitetin. Deri më tani duket se asnjëra palë nuk ka epërsi të dukshme ndaj kundërshtarit dhe kjo e shton edhe më shumë tensionin. Zgjedhjet gjithashtu janë në lupën e madhe ndërkombëtare që më shumë se për demokracinë shqetësohet për stabilokracinë. Po si pritet të jetë fushata në vijim dhe dita e votimit? Po procesi i mëtejshëm kur të nisë numërimi i votave? Të gjitha këto pikëpyetje kanë qëndruar në çdo palë zgjedhje, por shpresat janë që humbësi, cilido qoftë të pranojë rezultatin dhe ti bindet verdiktit qytetar. Në një qëndrim mbi situatën aktuale dhe atë çfarë pritet, analistët Plator Nesturi dhe Leonard Karaj për gazetën “Fjala” shprehen se tensionet mbesin shqetësim kryesor. Gjithashtu sipas tyre, mbajtja e publikut nën trysni i shmang liderët politik në parashtrim programesh dhe debateve të mirëfillta mbi çështjet e ndjeshme si ekonomia, shëndetësia, rendi, drejtësia dhe integrimi.
