Kohë më parë një lajm tronditës erdhi nga vendi i Spanjës ku u raportua për një aksident, ku dy viktimat ishin njëri shqiptar dhe tjetri rumun.
Por në fakt “Gazeta Shqip” raporton se të dy djemtë ishin nga Shqipëria, konkretisht nga qyteti i Fushë-Krujës.
Viktima, identiteti i të cilit tashmë dihet është 24-vjeçari Xhuliano Kora, ndërkohë burime për “Shqip” bëjnë me dije, se viktima tjetër është po ashtu patriot me Korën, 28-vjeçari M.T. Ky i fundit u raportua si rumun, por në fakt është shqiptar i martuar me një rumune.
Ajo që e bën të çuditshme atë që u quajt aksident është fakti që dy shqiptarët u gjetën pa rroba, ndërkohë që njëri prej tyre u gjet edhe pa kokë.
Jo më larg se dje, familjarët e Xhuliano Korës bënë apel për rikthimin e trupit të 24-vjeçarit.
Në një mesazh drejtuar redaksisë së Top Channel, ata thonë se e kanë mësuar nga persona të tjerë, më pas i janë drejtuar Ministrisë së Jashtme, të cilët kanë dhënë vetëm emrin e viktimës dhe asnjë detaj në lidhje me aksidentin. Sipas tyre, ministria u ka thënë se cështja i takon shtetit spanjoll. Familja apelon që ambasada shqiptare në Spanjë të vihet në lëvizje për këtë ngjarje të rëndë.
