Nga Fernada Cenko
Mazhoranca po përshpejton procedurat për të shkarkuar nga detyra Presidentin Ilir Meta, ndërkohë që ka ftuar opozitën për të bashkëpunuar në zgjedhjen e Presidentit të ri. Ende nuk dihet çfarë vendimi do të marrë Gjykata Kushtetuese pas dorëzimit të materialit nga Kuvendi i Shqipërisë. Gjithsesi Rama ka kërkuar uljen e opozitës dhe mazhorancës në tryezën “Për Presidentin” dhe kjo pastaj në varësi të vendimit të Gjykatës Kushtetuese nëse do e zgjedhin presidentin para, apo pas përfundimit të mandatit më 22 korrik 2022.
Ka qenë vetë kryeministri që në një takim me deputetët e Partisë Socialiste, caktoi objektivat e rinj për mandatin e tretë, ku veçohet bashkëpunimi me opozitën dhe zgjedhja e një presidenti konsensual. Rama ka qenë i vendosur që në qeverisjen e tij për Lëvizjen Socialiste për Integrim të mos ketë asnjë bashkëpunim.
“Me Ilir Metën dhe me partinë e tij nuk ka dhe nuk mund të ketë asnjë bashkëpunim. Ilir Meta duhet të shkarkohet nga detyra si një personifikim i antishtetit, i ndëshkuar nga populli më 25 prill, një personazh grotesk që e turpëron Shqipërinë dhe çdo qytetar normal me praninë e tij në krye të shtetit. Shkarkimi i Metës nuk është i gjithi në dorën tonë, por do të bëjmë gjithçka që kemi në dorë për të votuar në bllok shkarkimin. Është shumë herët për të folur për zëvendësuesin e tij, por në çdo rast do të konsultohemi me PD-në për emrin e Presidentit të ri”, tha Rama.
Kreu i qeverisë tha se do ta mbajë të shtrirë dorën e bashkëpunimit me opozitën dhe do ta presë PD-në derisa të vendosë lidhjet me realitetin. “Ne nuk do ta presim PD-në deri kur të vendosin lidhjet me realitetin, por jemi gati të bashkëpunojmë me demokratët kurdo që të jetë e mundur dhe sidoqoftë të jetë e mundur. Pa u lodhur, pa humbur durimin dhe toruan, ne do ta mbajmë të shtrire dorën e bashkëpunimit me opozitën dhe nuk do lëmë rast pa ua treguar me fjalë dhe me vepra se kjo është dekada për ta ngjitur lart Shqipërinë”, tha Rama.
Reagimi i PD
Partia Demokratike ka dalë me reagim zyrtar pas deklaratës së kryeministrit Edi Rama që tha se PS do të konsultohet me PD-në për emrin e Presidentit të ri të vendit, pas shkarkimit të kreut të shtetit Ilir Meta. Sipas PD-së, qëllimi i kryeministrit është “që të largojë vëmendjen” dhe ndaj “vazhdon gënjeshtrat, manipulimet dhe diversionet”.
“Asnjë diversion nuk do të na ndalë në këtë betejë, duke filluar me shpalosjen e fakteve, provave dhe të dhënave që dëshmojnë pamasën e plotë të masakrës zgjedhore nga regjimi Rama-Doshi-Rakipi”, thotë PD. Partia Demokratike thekson se detyra e tyre ndaj shqiptarëve është të qëndrojnë të vendosur dhe të luftojnë fort për kthimin e demokracisë në vend. “Edi Rama është autori i masakrës elektorale dhe tjetërsimit të vullnetit të shqiptarëve për ndryshim.
Me qëllim që të largojë vëmendjen ai vazhdon gënjeshtrat, manipulimet dhe diversionet. Vjedhja e zgjedhjeve nga Rama-Doshi-Rakipi e çuan vendin tonë drejt një masakre masive elektorale, ku viktimat janë qytetarët shqiptarë dhe e ardhmja e tyre. Detyra jonë ndaj shqiptarëve është të qëndrojmë të vendosur dhe të luftojmë fort për kthimin e demokracisë në vend”, thuhet në deklaratën e Partisë Demokratike.
