Zgjedhjet brenda PD-së kurorëzuan pa asnjë surprizë për herë të tretë Lulzim Bashën si kryetar, por në selinë blu nuk mund të ketë “festë”. Si u zhvillua gara dhe ndikimi i Sali Berishës në ditët e tij më të vështira, pas shpalljes “non grata” nga SHBA. Si pritet të reagojë Basha dhe a do e “vrasë babain politik” duke e larguar nga grupi parlamentar? Flasin për gazetën Fjala analistët Lorenc Vangjeli, Plator Nesturi dhe Leonard Karaj.
Nga Fernada Cenko
Në Partinë Demokratike vetëm për festë, qoftë edhe të sajuar nuk ka kohë, ndonëse është “rikurorëzuar” me kryetar të ri. Basha mori për herë të tretë postin e kryeopozitarit, ndërsa Rama për herë të tretë postin e kryeministrit. Loja është po e njëjta me Bashën që pasi humbet zgjedhjet rend për të çimentuar pozicionin e kryetarit të partisë, ndërsa rivali i vërtetë Rama shtron i qetë rrugën e qeverisjes, pa e kthyer kokën pas nga “kundërshtari” Basha, por as anash, nga “mik-armiku” Meta. Për ta bërë më atraktive këtë situatë politike disi bajate pa adrenalinë, ka menduar ish-kryeministri Sali Berisha i cili hodhi së fundmi disa tymnaja blu brenda oborrit të PD-së që e lindi, e rriti dhe e “plaku” politikisht. Ditën që në PD votohej për kryetar, Berisha mbajti dy orë takim me Bashën, ndërsa pati deklaruar se “Kurrë mos thuaj kurrë”-kur u pyet për një rikthim të mundshëm në krye të partisë. Sigurisht aty në takim nuk është folur për “kryetarin triumfues” dhe për urime, por për çështje që prekin PD-në dhe Basha tashmë do i duhet të vendosë për të ardhmen e Berishës, që paradoksalisht është e lidhur edhe me të ardhmen e tij. Ish-kryeministri Berisha është shpallur person “non grata” nga SHBA. Është një peshë e rëndë për Bashën nëse do i duhet që me dhimbje të “vrasë babain politik” duke e përjashtuar Berishën nga Grupi Parlamentar Demokrat, apo ta mbrojë para Uashingtonit zyrtar, që e tha me vendim fjalën e saj? Ti kërkosh Bashës sot të marrë vendime është e kotë, pasi edhe më “vizionari politik” do kishte dridhje gjunjësh. Megjithatë Basha pa triumf, fatkeqësisht edhe po moral politik e ka siguruar vulën e kryetarit të partisë, e cila i jep pushtet. Nga ana tjetër, një staturë politike si Berisha as që e mendon se “shkopi i zgjatur” në lumin e rrëmbyer nga ku mund të dalë është Lulzim Basha. Berishës sot i dhimbset së pari vetja dhe së dyti partia me të cilën përbysi sistemin komunist, por sot po vetëpërbyset edhe pse ka një “dorë të fortë” që drejton, fundja është zgjedhur tre herë kryetar dhe kjo nuk është “pak” pasi shënoi humbje pas hubjesh në zgjedhjet e përgjithshme dhe para kundërshtarëve të vërtetë politik.
