Ka përfunduar në prangat e policisë prokurori i Prokurorisë së Kukësit Edmond Karriqi. Ky i fundit raportohet se është arrestuar në qytetin e Kavajës.
Mësohet se në pranga ka rënë edhe shoferi i tij, ndërsa është kontrolluar edhe banesa e prokurorit. Sipas të dhënave paraprake, prokurori Karriqi është arrestuar pasi ka të dhëna për korrupsion.
Sipas burimeve nga prokuroria është arrestuar edhe një zyrtar në Prokurorinë e Kavajës. Bëhet fjalë për Isuf Gega, me detyrë sekretar në këtë prokurori.
Arrestimet kanë ardhur me urdhër nga SPAK, ndërsa dyshohet për një rast korrupsioni por nuk dihet qartësisht se për çfarë bëhet fjalë.
Edmond Karriqi është Drejtuesi i Komanduar nga KLP në krye të prokurorisë së Kukësit, ndërsa emërimin e tij, e ka si prokuror në detyrë në prokurorinë e Lushnjës. Tre vite më parë Karriqi ka shërbyer si prokuror edhe në Kavajë.
