Edhe pse duket e pabesueshme, është mëse e mundur të marrësh ankesa nga të tjerët për postimin e një fotoje tënde. Megjithatë, kjo është diçka që mund t’u ndodhë vetëm personave të famshëm.
Këngëtarja shqiptare me famë ndërkombëtare, Dua Lipa po përballet me një proces gjyqësor pasi shpërndau një foto të realizuar nga një gazetar pa lejen e tij.
Integral Images paraqiti një padi me tetë faqe kundër yllit të muzikës të martën duke pretenduar shkelje të së drejtës së kopjimit sepse ajo e bëri këtë “pa leje ose autorizim”.
Sipas Billboard, kompania shkruan se Dua ndau një nga fotot e tyre pa marrë leje, në të cilën ajo shfaqet teksa largohet nga një aeroport e veshur me një kapelë të madhe, edhe tha se se do të kërkojë 150,000 dollarë dëmshpërblim.
Këtë foto, këngëtarja e shpërndau në profilin e saj në Instagram në shkurt 2019-s. Mirëpo, Integral Images ka argumentuar se këngëtarja përdor faqen e rrjeteve sociale si një mjet marketingu.
Gazeta e njohur angleze “Daily Mail”, e cila i bëri bujë këtij lajmi, është munduar të kontaktojë menaxherin e këngëtares për të zbuluar anën e tyre të kësaj historie, por nuk ka marrë ende një përgjigje.
Dua Lipa nuk është i vetmi personazh VIP që përballet me një akuzë të tillë. Në vitin 2018, modelja e njohur Gigi Hadid u hodh në gjyq nga paparacët për shkak se kishte postuar një foto të sajën pa cituar gazetarin që kishte shkrepur foton. Modelja reagoi menjëherë duke u shprehur se pavarësisht faktit që kjo është puna e një ‘paparazzi’, ata duhet të kuptojnë se kjo që po bëjnë është cënim i privatësisë.
