Më 23 dhjetor të vitit të kaluar, në një ceremoni të posaçme, u hodhën në Laç në mënyre simbolike themelet e lagjes së re të qytetit, të financuar nga qeveria turke. Ceremonia ishte edhe një ‘celebrim’ i miqësisë mes 2 vendeve, me praninë e kryeministrit Rama, ministri të rindërtimit Ahmetaj, ministrit turk të Infrastrukturës, Murat Kurum, teksa nga Turqia pati një komunikim live edhe të presidentit Recep Erdogan.
8 muaj më vonë, Laçit duket se shumë shpejt do t’i jetëzohet lagjja e re me 524 apartamente, ku do të strehohen familjet e mbetura pa shtëpi pas tërmetit të 26 nëntorit 2019.
Pamjet nga puna që është bërë deri më tani i publikoi mëngjesin e sotëm Kryeministri Rama.
“MIRËMËNGJES , dhe me zemrën e rilindur të Laçit, që së shpejti do të jetëzohet me 524 apartamente me standarde të larta, në 13 pallate me 375 vendparkime, 37 njësi shërbimi, qendër tregtare e infrastrukturë krejt të re, ju uroj një ditë të mbarë”, shprehet Rama krahas pamjeve të publikuara.
Këto pamje i përkasin Zonës 1 të lagjes së re në Laç, e cila financohet nga qeveria turke, ndërsa ka edhe një zonë 2, që ndërtohet nga qeveria shqiptare.
