Mbrëmjen e djeshme SHÇBA ka shkatërruar një grup të shpërndarjes së drogës në disa pika të Tiranës, ku mes të ndaluarve ishte edhe një efektiv i RENEA-s. Në foto është efektivi i RENEA-s, i cili u kap në flagrancë bashkë me 4 persona të tjerë ndërkohë që po shpërndanin kokainë dhe kanabis gjatë një operacion anti-drogë që është në vijim e sipër nga SHÇBA. Efektivi i RENEA-s, Real Luli, ishte koka e grupit të shpërndarjes së drogës në disa pika të Tiranës.
Përveç efektivit të RENEA-s, në pranga ranë edhe 4 persona të tjerë Jurgen Luli, 30 vjeç, Gertjan Harapi, 26 vjeç, Gevi Spahia, 27-vjeç dhe Ergi Sala, 26 vjeç.
Grupi për shpërndarjen e lëndëve narkotike vepronte kryesisht në zonën e njohur si “Parku i autobusëve”, Kombinatit, Misto Mame, Yzberisht dhe Qytet te Nxënësve.
Që prej ditës së djeshme policia ka kontrolluar banesat e të arrestuarve, ndërsa ka sekuestruar kokainë, kanabis, para dhe armë.
Aktualisht po vazhdojnë hetimet për zbardhjen e plotë të personave të implikuar në këtë grup që merrej me shpërndarjen e drogës në Tiranë.
