Magjia e Champions League rikthehet mbrëmjen e sotme me përballje interesante ku shumë skuadra luajnë fatet e tyre për kualifikimin e mëtejshëm.
Sfidat e para do të jenë ato mes Malmos dhe Chelseas si dhe Wolfsburg-Salzburg. Kampionët e Europës ndodhen në vendin e dytë në grupin H dhe kundërshtarët me 3 humbje në po kaq ndeshje priten të jenë një ‘kafshatë e lehtë’ për skuadrën e Tuchel. Nga ana tjetër ‘ujqit’ e Bundesligës do të shpresojnë të marrin 3 pikët e para ndaj kryesuesve të Salzburgut në shtëpi.
Në mbrëmje, Atalanta do të presë në shtëpi Manchester United, me këta të fundit që vuajtën jo pak ndaj skuadrës së Gasperinit, por gjithsesi përmbysën rezultatin në “Old Trafford”. Kjo do të jetë një provë tjetër për Solskjaer, stoli i të cilit është ende në pikëpyetje.
Në grupin E, Bayerni i pandalshëm do të presë Benficën në shtëpi, ndërsa Barcelona do të udhëtojë në Ukrainë për tu përballur me Dynamon e Kievit. Katalanasit nuk po kalojnë një moment të mirë, por gjithsesi fitorja është një obligim edhe pa trajner, me Koeman që u shkarkua para disa ditësh.
Juvja ‘me dy fytyra’ i Allegrit do të presë Zenitin në shtëpi. Zonja e Vjetër vazhdon të zhgënjejë në Serie A, ku të shtunën mori një tjetër humbje shokuese ndaj Veronës, por në Champions ka një ecuri për tu patur zili me 3 fitore dhe kryesimin e grupit,ndërkohë që sot do të tentojë të vulosë kualifikimin.
Gjithashtu, Champions ka rezervuar edhe dy sfidat e tjera të dy skuadrave spanjolle, ku Sevilla do të presë Lillen në shtëpi, ndërsa Villareal do të përballet me zvicerianët e Young Boys.
