Krijimi i një akademie për barinjtë ka ngjallur jo pak zhurmë në media por edhe tek qytetarët lidhur me funksionin e qartë të saj. Për këtë arsye Ministrja e Bujqësisë, Frida Krifca ka sqaruar se kjo akademi është marrë shembull nga vendet e botës që e aplikojnë si Zvicra apo Spanja dhe se kjo bëhet për të ruajtur traditën në këtë zanat.
Ministrja tha se do të krijohet infrastruktura e nevojshme mbështetëse për ta, qoftë edhe me panele diellore ne stane.
“Fjalën akademi nuk e kemi shpikur por e kemi parë në disa vende të botës si Zvicra, Anglia, Spanja dhe po krijojmë një qasje drejt zgjidhjes së migrimit të njerëzve nga profesioni i bujkut, blektorit duke i adresuar për të dhënë mbështetje që t’i përqafojnë këto profesione. Të mbështesim stanet me infrastrukturën e nevojshme apo edhe me panele diellore që të lehtësojmë jetën e tyre dhe të mbështesim sa më shumë këto profesionistë në fushën e tyre. Në këtë mënyrë do të ruajmë edhe traditën në fusha të tilla”, tha Krifca.
Këto sqarime ministrja i bëri në Komisionin e Ekonomisë ku po prezanton buxhetin 2022 për Ministrinë e Bujqësisë dhe investimet që do të bëhen në te.
