Një person u arrestua të martën në Paris, si i dyshuar për vrasjen e gazetarit saudit, Jamal Khashoggi. Por një zyrtar i qeverisë franceze tha të mërkurën se hetimet vazhdojnë, për shkak se forcat e sigurisë thanë se kishin ndaluar njeriun e gabuar.
Personi i arrestuar të martën quhej Khaled Aedh Al-Otaibi, njësoj si ish-pjesëtari i Gardës Mbretërore të Arabisë Saudite, që dyshohet se ka vrarë gazetarin disident në Turqi. Por edhe pse emri figuronte në listën e të kërkuarve nga Interpoli, autoritetet franceze thanë se bëhej fjalë për një tjetër njeri. I dyshuari u arrestua teksa po ngjitej në avionin e linjës Paris-Riad.
Khashoggi u vra në vitin 2018 në ambasadën e Arabisë Saudite në Stamboll. Sipas një hetimi të Organizatës së Kombeve të Bashkuara, në ekzekutimin e tij morën pjesë 15 persona. Vrasja e tij shokoi botën dhe dëmtoi rëndë reputacionin e princit të kurorës së Arabisë Saudite, Mohammad Bin Salman, për të cilin inteligjenca amerikane pretendoi se “aprovoi” vrasjen. Në vitin 2019, Arabia Saudite dënoi pesë burra me vdekje dhe burgosi tre të tjerë për vrasjen, një rast që është kritikuar gjerësisht nga grupet e të drejtave të njeriut.
