Rithemelohet Bordi i Autoritetit Kombëtar të Ushqimit, për një kontribut konkret në detyrat e AKU-së. Bordi do të përmbajë në strukturën e tij vendimmarrëse kryesisht përfaqësues nga shkenca, prof. dr. pedagogë nga Fakulteti i Bioteknologjisë dhe Ushqimit, Fakulteti i Bujqësisë dhe Mjedisit, Fakulteti i Mjekësisë Veterinare, etj.
Ministrja Krifca, në takimin e mbajtur, vlerësoi faktin se struktura e këtij bordi, i cili po kthehet pas disa vitesh në një organ funksional, me bazë të fortë shkencore dhe teknike, do të ekzistojë jo thjesht si një detyrim ligjor, por për një shërbim aktiv e konkret, për ta cuar në një tjetër standard nivelin e ndërveprimit për garantimin e sigurisë ushqimore.
“Referuar një ndër shtyllave kryesore të programit të qeverisë shqiptare ‘Mirëqenie për të gjithë’, siguria ushqimore është padiskutim një ndër kryefjalët e nismave e politikave tona”, tha Krifca në fjalën e mbajtur.
