Policia e Shtetit vijon kontrollet blic dhe operacionet policore kombëtare e ndërkombëtare, për kapjen e personave në kërkim, atyre që qarkullojnë me armë zjarri pa leje, që transportojnë e trafikojnë lëndë narkotike apo që ushtrojnë veprimtari kriminale në fushën e krimeve mjedisore, lojërave të fatit, kontrabandës, dhënies ndihmë për kalim të paligjshëm të kufirit, dhunës në familje etj.
Gjatë kësaj jave, në të gjithë vendin janë zhvilluar 10 operacione policore të koduara, nga këta 9 operacione kombëtare dhe 1 ndërkombëtar, konkretisht operacionet: “Bratoshi”, “Linza”, “Koordinimi”, “Just in time”, Tabacino”, “Osumi”, “Antenat”, “Blic”, “Kriptofarm” dhe operacioni ndërkombëtar “Astrolabio” i zhvilluar me Italinë dhe Greqinë.
Në kuadër të këtyre operacioneve janë arrestuar 34 shtetas, nga këta 18 në kuadër të operacionit “Astrolabio”.
Janë zbuluar dy laboratorë për prodhimin e kriptomonedhave.
Janë sekuestruar 4 armë zjarri, lëndë narkotike kokainë dhe kanabis, municion luftarak, armë të ftohta, shuma parash dhe sende të tjera të kundërligjshme.
Janë kapur 12 persona në kërkim, nga këta 10 në kërkim kombëtar dhe 2 në kërkim ndërkombëtar.
Gjithashtu janë shpallur në kërkim 21 persona. Në fushën e narkotikëve janë evidentuar 29 raste, për të cilat janë proceduar e arrestuar 29 persona.
