Shkrimtari i njohur Albatros Rexhaj së fundmi ka rrëfyer se shumë kohë më parë ka pësuar vdekje klinike. Betejë e fituar nga Rexhaj e cila e ka ndihmuar që të mos shohë më jetën dhe botën njësoj.
Ai thotë se kjo gjë e ka mësuar që të respektojë veten më shumë dhe u dhënë hapësirë gjërave që janë vërtet të vlefshme për të.
“Mua më ka mësuar kjo gjë që duhet ta respektoj veten pak më shumë, ky është mësimi më i madh, edhe në kuptimin që ta respektoj veten duke i dhënë hapësirë gjërave që janë vërtet të vlefshme për mua. Një prej gjërave që është vërtet e vlefshme për mua është nevoja që të shprehem, që të mos ndjehem i bullizuar, për faktin që dua të shprehem. Unë jam bullizuar shumë për këtë pjesë kur kam filluar të shkruajë, kam arritur në një pikë ku kam fituar një lloj rezistence. Kjo është një stuhi, një furtunë që unë duhet të kaloj nëpër të dhe në fund kur të dal, unë do të jem i kënaqur me veten time për faktin sepse kam rezistuar.
Këto probleme që kam pasur kohë pas kohe, më kanë bërë mos heq dorë nga ëndrrat e mija. Në vend që të jetojë me pengje, kam vendosur të mos kem pengje në vetvete, pengje shpirtërore, dhe dua t’i ndjej ëndrrat e mija. Tani rezistoj ndaj idesë që të tjerët duhet të jenë skenaristë në jetën time, unë jam vet skenarist, vet regjisorë nëse është nevoja do bëhem edhe superstar si të më jepet mua kënaqësia, sepse nëse unë ndjehem i kënaqur, unë ndjehem i dobishëm. Këtë kam kuptuar unë, jeta është një listë e madhe e gjërave që janë tërësisht klishe” u shpreh ai.
Ndërsa duket se është në hakmarrje me botën që e rrethon, ai u shpreh se thjesht përpiqet të jetë vetvetja e të mos ndikohet nga shoqëria.
“Unë e rikrijoj veten time kohë pas kohe, edhe në çdo udhëtim të ri që lind un gjej diçka të re nga vetja ime. Unë realisht përpiqem që ta luftojë palumturinë që shoqëria përpiqet të ma nxisë mua gjithë kohën. Jo nuk jam në hakmarrje, thjesht rezistoj në përpjekjen time që të jem vetja. Të shumtën e kohës unë i humb betejat por nuk e humb luftën. Kjo është pjesë e filozofisë që unë kam. Refuzoj të dorëzohem para rrethit, para shoqërisë, para bullizmit kolektiv që ka kjo shoqëri” tha ai në emisionin “Rreze Dielli”.
