I ashpër ishte Lulzim Basha ndaj Sali Berishës për akuzat që ky i fundit i ka bërë për përvetësim bashkë me Ramën të 800 mijë metër katror tokë në Portin e Durrësit. Nga Durrësi ku ishte në një takim me tregtarët, i shoqëruar nga kandidati i PD-së për këtë bashki më 6 mars, Luan Hoti, Basha tha se ka sharlatanë që ecin në politikë vetëm përmes gënjeshtrave.
Basha thotë se akuzat e Berishës janë një gënjeshtër e pastër dhe sipas tij PD ka fuqimisht për transparencë në projektin e Portit të Durrësit, të cilin e konsideron një aferë.
“Thonë se do investojnë 3 miliardë, ne duam të shohim 6 apo 8 të investohen, nuk jemi kundra investimeve. PD është pro zhvillimit. Kjo punë s’bëhet duke sjellë një sheik.”-tha Basha.
2 ditë më parë në Durrës ishte ish-kryeministri Sali Berisha. Ai akuzoi kryeministrin Rama dhe kryedemokratin Lulzim Basha se po grabisin 800 mijë metër katrorë tokë në Port. Sipas Berishës, kjo po realizohet nëpërmjet një skemë të mirëfilltë mafioze, duke gjetur një kompani në Emiratet e Bashkuara dhe pas ‘zhdukjes’ së emirit, 100% e aksioneve iu shitën “kompanisë ofshorë të Rama-Basha”. Sipas Berishës, kjo po bëhet vetëm, për të fshehur paratë e drogës.
