Tashmë që kampionatet janë mbyllur dhe me eventin më të madh sportiv “Champions League” që sapo zgjodhi kampionët e këtij sezoni, fokusi kryesor i shtypit sportiv është tek merkato dhe lëvizjet kryesore të klubeve.
Më poshtë janë titujt kryesorë të disa nga mediave më të famshme sportive:
“AS” nuk e heq fokusin nga kampionët e Europës, Real Madrid të cilët fituan Championsin e 14-të në histori, ndërsa nuk frenon ambiciet për sezonin e ardhshëm: “Shkojmë për trofeun e 15-të”.
“Mbretëreshat” shkruan “Sport”, për skuadrën e femrave të Barcelonës që triumfuan në “Copa de la Reina”.
Për të njëjtën gjë flet edhe “L’Esportiu” e cila mban titullin: “Nuk ishte dhe aq e thjeshtë”.
“L’Equipe” ka në fokus Realin e Madridit me titullin: “Kampionët e Europës”.
“Mundo Deportivo” i kushton faqen e parë merkatos së Barcelonës dhe objektivit të saj kryesor në merkato me titullin: “Lewandowski insiston”.
“Marca” i kushton trofeut të Championsit të fituar nga Reali faqen e parë të saj dhe Marcelon që e puth atë. “Vajza e bukur” është titulli që zgjedh prestigjiozja spanjolle.
“Tërbimi i të kuqve” është titulli i “Mirror Sport”, me fokus Liverpoolin, që përveç humbjes në finale, nuk ka fshehur pakënaqëiste as ndaj organizimit të UEFA-s për finalen e madhe.
“Maldini në shtëpinë e Milanit”, është titulli i “La Gazzeta dello Sport”, e cila flet për drejtorin sportiv të kuqezinjve, që do të takohen me drejtuesit për të vendosur të ardhmen.
“Corriere dello Sport” e ka fokusin tek merkato dhe flet për transferimet e mundshme të Lukakut dhe Dybalas. “Lukaku drejt Interit, shtyn Dybalën tek Mourinho”, shkruan prestigjiozja italiane.
“Chiesa-Vlahovic, çifti më i bukur” është titulli i “Tuttosport”, me të përditshmen torineze që i kushton artikullin kryesor dyshes së sulmit të Juventusit.
