Në një kohë konfliktesh, ku varen edhe fatet e kombeve, Shqipëria ka marrë presidencën e Këshillit të Sigurimit në OKB. Kryeministri Edi Rama ka mbajtur fjalën e tij, ku ka përmendur Kosovën, si një plagë lufte që është ende e hapur. Cili pritet të jetë roli i Shqipërisë në Këshillin e Sigurimit të OKB-së.
Shqipëria ka marrë dje presidencën e Këshillit të Sigurimit të OKB-së. Në fjalën e tij kryeministri Edi Rama deklaroi se demokracia dhe të drejtat e njeriut po sprovohen rëndë në anë të ndryshme të botës. Ai u shpreh se bashkësia ndërkombëtare po bën të pamundurën për të vënë para përgjegjësisë autorët. Rama nënvizoi plagën e hapur të luftërave pas shpërbërjes së ish-jugosllavisë veçanërisht në Kosovë. “Kjo është dekada e tretë e mijëvjeçarit të tretë. Bota është e trazuar dhe vazhdojmë te jemi dëshmitarë të mizorive të papërshkrueshme.
Demokracia dhe të drejtat e njeriut po sprovohen rëndë në anë të ndryshme të botës. Bashkësia ndërkombëtare po lufton të vendosë autorët para përgjegjësisë”, është shprehur kryeministri Edi Rama. Ai tha se në Europë plagët e luftës janë ende të hapura. “Në Europë plagët e luftërave që pasuan shpërbërjen e ish-Jugosllavisë sidomos në Kosovë janë ende të hapura. Po bëjmë çdo gjë që është e mundur për të ecur përpara. Lufta e Rusisë në Ukrainë ka sfiduar sigurinë europiane dhe ka tronditur rendin botëror. Nuk duhet të mësohemi me pandëshkueshmërinë. Është urgjente të veprojmë tani për viktimat e panumërta por edhe për ne të gjithë për të mbrojtur ligjin. Të gjithë kemi pjesën tonë për të bërë. Kjo është arsyeja pse ngjarja e parë përfaqësuese e Shqipërisë që kam nderin të drejtoj i drejtohet forcimit të llogaridhënies. Shqipëria e promovon atë ndërkombëtarisht. Drejtësia dhe paqja shkojnë bashkë. Jemi të privilegjuar t’i japim zë bindjeve tona”, deklaroi Rama.
Reagimi i Xhaçkës
Ministrja për Europën dhe Punët e Jashtme Olta Xhaçka, nëpërmjet një statusi në Tëitter shkruan se tashmë nis fillimi i një punë intensive me një agjendë ambicioze, me nisjen e ditës së parë të Presidencës në Këshillit e Sigurimit të OKB-së. Gjithashtu Xhaçka shprehet se është një aktivitet me një përgjegjshmëri për forcimin e drejtësisë për shkelje të rënda të së drejtës ndërkombëtare. “Aktiviteti i parë nënshkrim për forcimin e përgjegjshmërisë dhe drejtësisë për shkelje të rënda të së drejtës ndërkombëtare nesër me Kryeministrin”, shkruan Xhaçka.
Marrja e Presdiencës
Shqipëria dje mori presidencën e Këshillit të Sigurimit në Nju-Jork. Në ceremoninë e marrjes të kësaj presidence 30-ditore do të mbajë një fjalë kryeministri Edi Rama, i cili i parapriu me një takim me sekretarin e përgjithshëm të organizatës, Antonio Guterres. Vendi ynë i është bashkuar Këshillit të Sigurimit të Kombeve të Bashkuara, si anëtar jo i përhershëm ku ka marrë edhe përgjegjësinë e bashkëpenëmbajtësit me Shtetet e Bashkuara, për çështjen e Ukrainës. Shqipëria në Këshill ka treguar vendosmëri përkrah SHBA-së në udhëheqjen e këshillin me disa rezoluta për Ukrainën.
