Kryeministri Edi Rama nuk është kursyer para gazetarëve bullgarë.
I ndodhur në Bruksel, Rama u ndal të jepte një prononcim për ta, por e nisi duke thënë se ata ishin një vend turpi që kishin marrë peng Shqipërinë dhe Maqedoninë e Veriut. Kryeministri Rama shtoi se kjo gjë po ndodhte, ndërkohë që po zhvillohet një luftë e nxehtë në Evropë dhe 26 vendet e tjera të BE-së vetëm vëzhgojnë.
“O, Bullgaria, ju jeni lëmsh djema, jeni shumë lëmsh dhe është shumë turp. Është një turp që një vend i NATO-s të marrë peng dy vende të tjera të NATO-s në mes të një lufte të nxehtë dhe nën mbikëqyrjen e 26 vendeve të BE-së që qëndrojnë të qetë në një shfaqje të frikshme impotence!”- tha Rama para mediave bullgare.
Sot dhe nesër, më 23 dhe 24 qershor do të mbahet samiti i Bashkimit Europian në Bruksel. Por, për Shqipërinë dhe Maqedoninë e Veriut duket se nuk do të ketë përparim në lidhje me negociatat duke qenë se një ditë më parë qeveria e Bullgarisë ra dhe vetoja ndaj Maqedonisë së Veriut qëndron ende. Por, Ukraina pritet të marrë statusin e vendit kandidat për integrimin në Bashkimin Evropian.
