Një shqiptar dhe një grek janë arrestuar në lidhje me vrasjen mizore të 42-vjeçarit grek dy ditë më parë. Ata janë ndaluar në orët e para të mëngjesit të sotëm në dalje te autostradës, ndërsa po punohet për kapjen e bashkëpunëtorëve.
Sipas medias greke Proththema, sherri që çoi në vrasjen e 42-vjeçarit kishte nisur mbrëmjen e të shtunës në një lokal në zonën e Rafinës.
Shkak ka qenë debati që viktima kishte pasur me disa të rinj brenda lokalit. Fillimisht ai ka debatuar në tualetin e lokalit me njërin nga autorët dhe më pas sherri është përshkallëzuar në tavolinën ku ai ishte ulur me miqtë e tij.
Sapo 42-vjeçari ka dalë jashtë, të rinjtë me origjinë shqiptare kanë nisur ta qëllojnë me grushte dhe shkelma. Viktima ka rezistuar por në një moment njëri nga autorët e ka qëlluar në kokë me dorezë hekuri.
Ai është rrëzuar në tokë i mbuluar nga gjaku, ndërsa autorët u larguan menjëherë nga vendi i ngjarjes. Ambulanca e dërgoi të plagosurin në spital por ai nuk mundi të mbijetonte për shkak të plagëve.
