Nga Mitro Çela
DITARI I GAZETARIT
Shkurt 1991
Në Tiranë mbërriti për herë të parë Janullatusi. Ishte në firmosje e sipër dokumenti për t’u shpallur Kryepeshkop i Kishës Ortodokse Shqiptare.
Vendosëm të botojmë një intervistë në “RD”. Detyrën e mori përsipër Filipi.
Kryepeshkopi i ardhshëm qëndronte në hotel “Dajti”.
Miku pranoi të intervistohej.
Peshkopi fliste anglisht. Pas disa batutave erdhi finalja:
Filipi pyeti shqip: – Hirësia Juaj, beson në Zot?
Përkthyesi nisi të përtypet.
Filipi i tha: – Përkthe.
Ai ngurronte. Janullatusi u shqetësua. Problemin e zgjidhi vetë Filipi. Të njejtën pyetje e bëri greqisht.
Peshkopi ngriti të dyja duart lart, me vështrimin nga Perëndia. E puthi Filipin në lule të ballit dhe tha:
– Zot i Madh! Si ju paska katandisur komunizmi!…
