Merkato verore dhe zyrtarizimi i Kounde tek Barça janë kryefjala e mediave sportive për ditën e sotme. Barcelona mbylli transferimin e francezit për një shumë prej 50 milionësh plus 10 milionë si bonuse.
Ndjekim disa nga titujt kryesorë të mediave sportive:
“Nëntë objektiva që janë ende të mundshme”, me këtë titull hapet gazeta madrilene “AS”. Madridi po mendon të nënshkruajë me një sulmues nëse Mayoral, Asensio ose Ceballos largohen.
“Mundo Deportivo” ka shkruar “Nënshkrimi i pestë”. Barça dhe Sevilla njoftojnë marrëveshjen për transferimin e Koundé, vetëm në pritje të vizitave mjekësore dhe nënshkrimit. Barça për momentin lider në investimet në treg me 158 milionë euro.
“Milan, ja ku jam” është titulli i italianes “La Gazzetta dello Sport”. Është koha për të mbyllur transferimin e De Ketelaere, i cili ka qënë në pritje për disa kohë.
Edhe katalanasja “Sport” është fokusuar tek transferimi i fundit i Barçës dhe shkruan “Koundé është këtu”.
“Transferimet e reja do të duhet të presin” është titulli i prestigjozes “Marca”. Ancelotti respekton kampionët e Europës dhe e shtyn Madridin e ri për pas Superkupës. Ai u shpreh: Duhet të keni parasysh ata që fituan finalen në Paris.
E përditshmja franceze “L’Equipe’ e ka kthyer fokusin tek Formula 1 dhe ka si titull kryesor kampionin në fuqi Max Verstappen “Unë dua më shumë”. Për pilotin holandez, të bëhej kampion bote nuk ishte një ëndërr, por ai tani dëshiron të kurorëzohet përsëri dhe të thyej çdo rekord.
“Faleminderit Seb, zemër e kuqe” është titulli i “Quotidiano Sportivo”. 4 herë kampioni i botës në Formula 1, Sebastian Vettel, do të tërhiqet nga sporti në fund të këtij sezoni. Një legjendë absolute që do i mungojë këtij sporti.
“Unë dhe Dybala pa xhelozi” shkruan në titullin kryesor “Corriere dello Sport”.
Sulmuesi anglez Tammy Abraham ka folur në një intervistë ekskluzive për Romën e re që po lind: “Në këtë Romë ka vend për dy mbretër. Zgjedhja më e mirë e jetës sime ishte të vija këtu. Dua të shënoj më shumë se vitin e kaluar”.
