Në konferencën për shtyp ditën e sotme në Tiranë, kryeministri Pedro Sanchez, përsëriti qëndrimin që Spanja e konsideron pavarësinë e njëanshme e Kosovës si shkelje të drejtave ndërkombëtare.
Kryeministri Rama ka ndërhyrë duke u munduar të e minimizojë mospërputhjet, por ka theksuar se Spanja ka “arsyet e veta” (duke lënë të kuptohet se ato i përgjigjen çështjeve të brendshme politike) për mosnjohjen e Kosovës.
Problemi është se, në skenarin e riorganizimit ndërkombëtar që po merr formë pas pushtimit të Ukrainës, nuk ka vend për hapësira boshe, shkruan “El Pais”. Nëse Bashkimi Europian lë një hapësirë në Ballkan, Rusia do ta mbushë atë. Moska nuk e ka neglizhuar kurrë miqësinë e saj tradicionale me Beogradin dhe Putini ka nënshkruar një marrëveshje të favorshme për furnizimin me gaz me presidentin serb, Aleksandar Vuçiç, ndërsa ‘thumboi’ klientët e tij të NATO-s.
Serbia, në këmbim, refuzon të mbështesë sanksionet kundër Moskës, pavarësisht se ka dënuar pushtimin e Ukrainës në OKB. Shërbimet e inteligjencës aleate besojnë se Milorad Dodiç, udhëheqësi i serbëve të Bosnjës, po shërben si peng i Moskës në destabilizimin e strukturave të brishta shtetërore që dolën nga marrëveshja e paqes e Dejtonit të vitit 1995.
Loja që luhet në këtë cep të Evropës Juglindore nuk është vetëm ekonomike, por edhe strategjike. Ndaj Sanchez, si presidenti i ardhshëm me rotacion i BE-së, është e përkushtuar që sa më shpejt të jetë e mundur të ankorojë Ballkanin në projektin e komunitetit dhe të mbyllë rrugën drejt depërtimit rus. Kjo është ideja e përgjithshme, por pastaj secili vend luan me interesat e tij dhe ka vijat e veta të kuqe: Greqia dhe Bullgaria e kanë detyruar Maqedoninë të ndryshojë emrin dhe Kushtetutën e saj, ndërsa Spanja refuzon të njohë pavarësinë e Kosovës deri në një marrëveshje të pamundur me Serbinë.
