Personi që shikoni në foto është Arjan Tase, ish-shefi i Komisariatit të Himarës, i cili sot është shoqëruar në Komisariatin që ka drejtuar vetë deri disa kohë më parë, pasi akuzohet për goditjen me pasojë vdekjen e një fëmije të mitur në breg të detit në plazhin e Potamit.
Ngjarja e rëndë ndodhi rreth orës 14:00 të datës 2 Gusht. Aktualisht Arjan Tase mban detyrën Shefi i Seksionit të Policimit në Komunitet në Elbasan.
Reagimi nga Agjencia e Mbikëqyrjes Policore:
Pas marrjes dijeni të ngjarjes së rëndë të ndodhur në plazhin e Potamit, ku shtetasi Arjan Tase, me gradën Komisar dhe me detyrë Shef i Seksionit të Policimit në Komunitet në Komisariatin e Policisë Elbasan, ka goditur për vdekje një fëmijë 7 vjeç ndërsa drejtonte një mjet lundrues, Agjencia e Mbikëqyrjes Policore nën drejtimin e Prokurorisë së Rrethit Gjyqësor Vlorë ka ngritur menjëherë një grup të posaçëm hetimor për hetimin dhe zbardhjen e plotë të kësaj ngjarje.
Aktualisht, shtetasi Arjan Tase ndodhet i shoqëruar në Komisariatin e Policisë Himarë.
