Donald Trump duket se “ka zënë sërish” titujt kryesorë të lajmeve në Amerikë, në një kohë kur përflitet se ai po përgatitet të rikandidojë për president në 2024.
Së fundmi, ish-presidenti Donald Trump ka thënë se shtëpia e tij në Florida është “bastisur” nga FBI, madje agjentët i kanë hapur edhe një kasafortë. Trump tha në një deklaratë se Mar-a-Lago në Palm Beach ishte “pushtuar nga një grup i madh agjentësh të FBI”.
Mediat amerikane raportojnë se kërkimi lidhet me dokumentet që presidenti mund t’i ketë çuar në Mar-a-Lago pas largimit nga Shtëpia e Bardhë.
Sipas rrjetit amerikan, CBS News, Trump ka qenë në të ashtuquajturën ‘Kulla Trump’ në qytetin e Nju Jorkut, në kohën kur kanë ndodhur bastisjet.
Eric Trump, djali i Trumpit, ka thënë për kanalin Fox News, se kërkimet e FBI-së kanë qenë të lidhura me Arkivat Shtetërore.
Sakaq, menjëherë pas publikimit të lajmit, gazetarja e New York Times dhe bashkëpunëtorja e CNN, Maggie Haberman ka zbuluar disa imazhe që rëndojnë pozitat e ish-Presidentit.
Haberman ka zbuluar dy raste në të cilat Trump me sa duket ka hedhur dokumente konfidenciale të shkruara me dorë, në tualet, për t’i zhdukur.
Ndërkohë, CNN ka raportuar më parë sesi Trump shkeli ligjet e mbajtjes së të dhënave presidenciale dhe shpesh griste dokumente, drafte dhe memorandume pasi i lexonte ato. Ai hidhte periodikisht letrat në tualet në rezidencën e Shtëpisë së Bardhë, letra të cilat u zbuluan më vonë kur u thirrën teknikët për riparimin e tualeteve të bllokuara.
Në imazhet e zbuluara të hënën, është e paqartë se kujt apo çfarë teme i referohen dokumentet, por duket se ato janë shkruar me dorëshkrimin e Trump me stilolaps të zi.
Ndërkohë, Shtëpia e Bardhë deri më tani nuk ka bërë asnjë deklaratë mbi çështjen në fjalë.
