Kryetari i Bashkisë së Tiranës, Erion Veliaj ka vizituar sot selinë e Kryegjyshatës Botërore të Bektashinjve, me rastin e Ditës së Hashures.
Përveç urimit për gjithë besimtarët bektashinj, Veliaj dha edhe një lajm të mirë. Në një dalje për mediat, Veliaj deklaroi se 12 shkolla të reja do të hapen në shtator.
Kryebashkiaku tha se ky ishte një rekord i ri, që do t’i japë fund mësimit me dy turne.
Deri më tani janë ndërtuar 40 shkolla të reja.
“Me hapjen e 12 shkollave të reja dhe një duzinë me kopshte e çerdhe, këtë vit ulim ndjeshëm mësimin me dy turne dhe nuk besoj se ka një shkollë në Tiranë që të jetë e gjitha me dy turne. Do kemi shumë debate për Tiranën në zgjedhjet që do vijnë, por të paktën nuk do kemi më debat për mësimin me dy turne”, u shpreh Veliaj.
Nga ana tjetër, Veliaj bëri thirrje që t’i jepet fund zjarreve të qëllimshme në Tiranë.
Ai tha se është e pakuptimtë që ka njerëz, të cilët i vënë zjarrin një fondi pyjor vetëm sepse kërkon të hapë tokë truall, duke zaptuar kështu pasurinë shtetërore. Ai shtoi se për emergjencat që mund të shfaqen nga zjarret, bashkia është në gatishmëri me tre turne.
