Kryeministri i Malit të Zi po përballet sot me votën e mosbesimit ndaj qeverisë së tij, pasi firmosi në fillim të muajit gusht marrëveshjen me Kishën Ortodokse Serbe. Në seancën e votës së mosbesimit po zhvillohet një debat i ashpër mes kryeministrit shqiptar, Dritan Abazoviç dhe partisë së Milo Gjukanoviçit, e cila ka propozuar mocionin për rrëzimin e qeverisë së Abazoviçit.
Në replikat e tij ndaj Gjukanoviç, Abazoviç ka thënë në Parlament se do të nxjerrë fakte që provojnë se Gjukanoviç dhe njerëzit e tij, fshihen pas krimit të organizuar në vend.
Ndër të tjera, ai ka thënë me zë të lartë para deputetëve se i ka bezdisur dhe penguar gjithmonë fakti që ai është i një pakice, pra shqiptar.
”Që në ditën e parë u ka shqetësuar fakti që jam pjesëtar i një kombi pakicë [shqiptar]. Unë jam kryeministër që merr vendime të vështira, që mbrojti interesat kombëtare edhe pas 30 gushtit 2020, që ruajti kursin e politikës së jashtme”, ka thënë kryeministri i Malit të Zi.
”Jam kryeministër që merr vendime të vështira. Sot ndoshta bashkoheni të gjithë në urrejtje. Heren tjeter bashkohuni ne dashuri. Le të flasim për gjëra reale jo halucinacione e bash për këtë duhet të bashkohemi… Pres diskutimin dhe përpjekjen e sotme për të shpjeguar pse erdhi iniciativa për rrëzimin tim, kush është frymëzuesi dhe çfarë fshihet pas saj”, tha gjithashtu ai.
Abazoviç tha se pas saj nuk qëndron as rruga europiane, as dëshira për të përzier kartat politike.
