Elina Xhengo është sportistja me origjinë shqiptare që fitoi medalje ari në shtizë për Greqinë. Prej disa ditësh mediat greke raportojnë për suksesin e saj. Së fundi ka dhënë një intervistë edhe babai i saj, Pandeli Xhengo. Bashkë me gruan ai shkoi në Greqi në vitet ’90, aty ku lindi edhe 3 vajza, më e vogla prej tyre është pikërisht 19-vjeçarja Elina që fitoi medaljen e artë.
“Elina është një shpirt shumë i madh. Çfarë thotë ajo do ta bëjë. Jam shumë krenar për të”, shprehet babai i saj për Radio Thesaloniki. Më tej ai tregon vështirësitë e viteve të para të qëndrimit në Greqi.
“Kishim shumë vështirësi në fillim duke filluar që nga gjuha, puna, shtëpia e të gjitha me radhë. Pavarësisht kësaj ne u përpoqëm shumë dhe njerëzit këtu na kanë ndihmuar shumë”, tregon Pandeli Xhengo.
I pyetur për ndihmën nga politika apo nga shteti përsa i përket kushteve në të cilat stërvitet vajza e tij dhe shumë të rinj të tjerë në zonën e Halkidikisë, ai nuk e fshehu aspak zhgënjimin.
“Për politikën më mirë të mos flas. Asnjëherë nuk ishte në krahun tonë. Të paktën për gjendjen ku vajzat stërviten që nuk është e përshtatshme”, thotë emigranti shqiptar që në Greqi punon si ndërtues.
Ndërkohë vëmendje të madhe në mediat greke ka marrë deklarata e Elinës, e cila është shprehur se tani që u shpall kampione përvecse do të vijojë karrierën e saj sportive, do të ndihmojë nënën që të mos punojë më. 19-vjeçarja përshkruhet nga banorët vendas dhe nga media si një vajzë e thjeshtë dhe shumë e dashur.
