Autoritetet britanike kanë dhënë alarmin për shifra në rritje të emigrantëve që kërkojnë azil në Mbretërinë e Bashkuar, të cilët më shumë janë shqiptarë. Ndaj shumë tabloide vendase iu “janë qepur” shqiptarëve, duke shkruar thuajse çdo ditë për ta.
Mirëpo, edhe në Gjermani duket se po ndodh e njëjta situatë. Në gjysmën e parë të këtij viti, Gjermania deportoi 6198 të huaj nga vendi, listë e cila kryesohet nga qytetarët e Maqedonisë së Veriut dhe Shqipërisë.
Siç shkruan Reporter.al, Autoritetet federale gjermane informuan Bundestagun se 6198 të huaj u dëbuan nga vendi nga janari deri në qershor të këtij viti, pas një kërkese për informacion të deputetëve të partisë së Majtë, raportoi media të premten.
Nga këto deportime, shtetësia më e përfaqësuar ishte ajo e qytetarëve të Maqedonisë së Veriut. Një total prej 454 personash u deportuan nga Gjermania në Maqedoninë e Veriut në periudhën 6-mujore.
Shqiptarët ishin në vendin e dytë me 402 persona të deportuar. Pas Shqipërisë, shtetasit e tretë dhe të katërt më shumë të deportuar ishin gjerogjianët dhe turqit.
Shqipëria mban deri tani vendin e parë mes shteteve të Ballkanit për numrin e azilkërkuesve në BE, sipas të dhënave të Eurostat për vitin 2021.
