Holanda do të mbështesë propozimet për të ndaluar hyrjen e turistëve rusë në Bashkimin Evropian, deklaroi sot ministri i Jashtëm holandez Wopke Hoekstra.
“Ne dëshirojmë të bëjmë një dallim midis shtetit rus dhe qytetarëve të tij. Por në të njëjtën kohë, shohim se shumica e njerëzve që vijnë këtu janë rusë shumë të pasur, të cilët shpesh kanë lidhje me regjimin”, tha Hoekstra për transmetuesin holandez RTL.
Kremlini ka kritikuar thirrjet e disa liderëve evropianë për ndalimin e vizave për turistët rusë, duke thënë se propozimet janë absurde dhe manifestimi i fundit i agjendës anti-ruse të Perëndimit. Në një takim në Pragë këtë javë, ministrat e jashtëm të Bashkimit EUropian do të diskutojnë një propozim nga shtetet baltike dhe disa të tjerë për të ndaluar lëshimin e vizave Shengen për rusët.
“Hap pas hapi, për fat të keq, si Brukseli ashtu edhe kryeqytetet individuale evropiane po tregojnë mungesë të plotë logjike”, tha zëdhënësi i Kremlinit Dmitry Peskov.
Vendet nordike dhe ato të Evropës Lindore po mbështesin me forcë ndalimin e plotë të vizave turistike për rusët në përgjigje të veprimeve të Moskës në Ukrainë, duke thënë se udhëtimi në Evropë është një privilegj, jo një e drejtë.
Por vendet e mëdha si Franca dhe Gjermania kundërshtojnë propozimet për të kufizuar vizat për rusët, duke thënë se një hap i tillë do të ishte kundërproduktiv.
