Në mbrëmjen e djeshme përjetuam disa ndeshje fantastike nga ekipet e mëdhaja. Juventus fitoi 2-0 në shtëpi kurse Napoli barazoi në shtëpi me një paraqitje të shëmtuar.
Në Premier League, Manchester City shkatërroi 6-0 Nottinghamin, Liverpool fitoi ndaj Newcastle me rezultat 2-1, kurse Tottenham doli “huq” duke barazuar 1-1 ndaj West Ham në transfertë.
Ndjekim disa nga titujt kryesorë të mediave sportive:
“La Gazzetta dello Sport” hapet me goditjen e lirë të Vlahovicit: “Juve, gjithmonë ai!“ Serbi tashmë është mbreti i golave dhe fsheh të metat e bardhezinjve ndaj Spezias.
Edhe “Corriere dello Sport” për sfidën Juve-Spezia: “E keqe dhe e shëmtuar”. Juve godet me Vlahovic dhe Milik.
“Vlahovic-Milik bum bum bum” ka shkruar torinezja “Tuttosport”. Një tjetër goditje dënimi kryevepër e Dushanit. Milik vulos sfidën me golin e dytë të sfidës në minutën e 92.
Në Britaninë e Madhe, “Daily Express” nxjerr në pah fitoren 6-0 të Manchester City ndaj Nottingham Forest. Protagonisti ishte super bomberi:“Mbreti Haaland i Cityt”. Një tjetër hat -trick për norvegjezin i cili shkon në kuotën e nëntë golave në Premier League.
“Eurobasket i Yjeve” ka shkruar gazeta madrilene “AS’. Donçiç, mbron titullin me Slloveninë, Antetokounmpo dhe Jokic, e mbushin me shkëlqim turneun që nis sot.
Katalanasja “Mundo Deportivo” fokusohet tek dita e fundit e merkatos: “Alba dhe Auba në kufi”. Chelsea ftoh interesin e saj për gabonezin. Alba shumë pranë Interit.
“Unë jam një tifoz i Real Madridit dhe do të jem gjithmonë.” është titulli kryesor i prestigjozes “Marca”. Intervistë me Pablo Laso. Trajneri thyen heshtjen dy muaj pas shkarkimit nga ekipi i Real Madrid Basket.
“Sport” fokusohet tek merkato e klubit katalanas duke shkruar “Transferimet e minutës së fundit”. Barça do të përpiqet të mbyllë marrëveshjet e Marcos Alonso dhe Bellerín para orës 12 të natës. Jordi Alba mund të shkojë në huazim te Interi dhe Dest në Milan.
