Një ditë më parë në hyrje të Parkut Kombëtar Divjakë-Karavasta kanë nisur punimet për vendosjen e një trau.
I pari që reagoi ishte deputeti socialist Erion Braçe.
“Po vendosin tra në hyrje të parkut, i pyes më thonë jemi punëtorë. U them kush po e bën më thonë ADZM. Edhe këtu tek moli për të bërë fotot e dasmave do të behet me pagesë. Për vendas e të huaj do të duhet të kalohet atje matanë tek trau me pagesë për të bërë xhiro në park. E shikoni ku ka arritur lajthitja në këtë vend?!”, tha Braçe në rrjetet sociale.
Kundër hyrjes me biletë në parkun e Divjakës shprehet dhe deputetja demokrate, Ilda Dhori.
Por këtë të premte, sipas Report Tv, punimet për vendosjen e traut janë ndërprerë. Nuk ka asnjë tabelë për punimet, ndërsa në asfalt gjendet e shkruar me të kuqe tarifa e biletës 150 lek/automjet.
Nga ana tjetër, policia njofton se ka pezulluar punimet dhe po heton një punëtor të firmës private pasi nuk dispononte leje ndërtimi për punimet.
