As lufta në Ukrainë, kriza energjetike apo inflacioni i shfrenuar nuk e ndalën hovin e turizmit në Greqi. Vendi fqinj ka shënuar një vit rekord në këtë sektor pas 12 vitesh krize financiare, dy vite pandemie të koronavirusit dhe 6 muajsh lufte në Ukrainë.
Pothuajse 400 000 turistë udhëtuan në ishullin e Korfuzit në gusht përmes Aeroportit Ioannis Kapodistrias, duke tejkaluar çdo kufi të mundshëm.
Kjo pasi 2 398 fluturime ndërkombëtare u realizuan muajin e kaluar – d.m.th. 200 më shumë se gushti i 2019 dhe 38 më shumë se korriku i 2022.
“Deri në fund të tetorit do të kemi mbi 1.6 milionë turistë të huaj që do të vijnë në ishull me fluturime ajrore, duke thyer rekordin e vitit 2018 prej 1.5 milionë mbërritjesh gjatë verës”, tha presidenti i shoqatës së punonjësve të Autoritetit të Aviacionit Civil të Korfuzit, Dimitris Roussos.
Rreth 200 000 turistë pritet të zbarkojnë në aeroportin e Korfuzit këtë muaj dhe të paktën 100 000 në tetor, ndërsa 1.33 milionë turistë kanë mbërritur deri më tani në tetë muajt e parë të 2022.
