Kryeministri Edi Rama ka dhënë së fundmi një intervistë për medien franceze “Metropole”, ku ka folur për shumëçka, që nga integrimi në BE tek mandati i katërt.
Rama ka deklaruar se ka filluar një ndryshim, lidhur me imazhin e Shqipërisë në Francë dhe se gjithmonë e më shumë francezë po vijnë në vendin tonë. Kryeministri theksoi se “nuk është një proces i parashikueshëm, sepse është një politikë e përhershme në Union, politika e brendshme e vendeve”.
Ai u shpreh se “imazhi që është krijuar për vendin tonë jashtë është një stereotip për Shqipërinë dhe shumë larg realitetit shqiptar”.
“Nuk dua të them se nuk ka korrupsion, gjithsesi Shqipëria ka probleme me korrupsionin pikërisht sepse ne ende nuk kemi shtet ligjor dhe institucione të afta për të luftuar të gjitha këto fenomene”, tha Rama.
I pyetur se çfarë do t’i sjellë Europës Shqipëria, Kryeministri nënvizoi se “Shqipëria është një nga vendet e Ballkanit”.
“Mendoj se është më konkrete se çfarë mund t’i sjellë Ballkani Evropës. Më shumë siguri, jo vetëm në kuptimin ushtarak, por edhe në luftën kundër emigracionit të paligjshëm, drogës, më shumë siguri, më shumë unitet, sepse është paksa si stomaku i Evropës. Ndaj nuk është ide e mirë që ta kesh stomakun të shkëputur nga trupi, sepse mund të krijojë shumë probleme”, shtoi ai.
I pyetur nëse do të kërkojë një mandatin e katërt, Rama tha:
“Të shohim, kam mësuar se jeta është ajo që ndodh ndërkohë që bëjmë plane të tjera. Ne duhet ta lëmë jetën të vendosë në vend që të pretendojmë të vendosim për jetën”.
