Një ngjarje e rëndë ka ndodhur ditën e djeshme në fshatin Ngraçan të Mallakastrës ku shtetasi Batjan Çelaj i moshës 63-vjeçare humbi jetën pasi piu fotoksinë.
Ngjarja u bë publike nga policia vetëm ditën e sotme, ku mësohet se janë referuar materialet për vlerësim në prokurori.
Por ngjarja bëhet akoma më e rëndë kur mësohet se i ndjeri ishte babai i Indrit Çelaj, 26-vjeçarit që u vra pas një konflikti banal në rrugën “Myslym Shyri” në Tiranë. Kjo ngjarje e cila shokoi të gjithë opinionin publik, ndodhi në 22 gusht 2019 ku Indriti u vra nga dy vëllezërit Griseldo dhe Albano Kusi pas një konflikti për tubin e kondicionerit.
Kujtojmë se Indriti kishte shkuar pranë biznesit të Bujar Kusit, babait të dy vëllezërve të përmendur më sipër për të kryer disa instalime për kondicionerët. Pas konfliktit banal, Griseldo Kusi qëlloi me një plumb në kokë teknikun 26-vjeçar duke i shaktuar vdekjen. Jo vetëm kaq, por sikur të mos mjaftonte kjo, dy vëllezërit së bashku me dy shokë u përpoqën të fshehin dhe manipulojnë vrasjen.
Gjykata e Tiranës dha vendim për t’i dënuar përkatësisht Griseldo Kusin me 12 vjet burg dhe Albano Kusin me dy vjet burg.
Gjatë asaj kohe Batjan Çelaj u shpreh kështu në lidhje me vrasjen e të birit:
“Kjo që më ndodhi mua mos i ndodhtë asnjërit. Kjo është fatkeqësi e madhe në Shqipëri. Ti nisesh në punë dhe kthehesh i vdekur është fatkeqësi. E kam marrë vesh nga gazetat. Çuni është vrarë në 11 paradite unë e mora vesh në orën 7 në darkë se i kishin marrë edhe dokumentet. Çunin e kishte marrë policia. Djali ishte në punë, punonte me kondicionerë se ka mbaruar edhe elektriken. Montonte kondicionerët. Asnjë konflikt nuk ka pasur djali, ka qenë i kulturuar dhe i sjellshëm. Rrallë gjen djalë si ai , nuk dinte të ofendonte ishte i matur. Ma morën djalin në moshë të re.”
