Mbi 300.000 nxënës në Kosovë e nisën me një muaj vonesë vitin e ri shkollor këtë vit për shkak të grevës në institucionet publike arsimore.
Arsimtarët hynë në grevë duke kërkuar rritje të pagave. Ndërkaq, mësohet se ditën e sotme Ministria e Financave ka bërë pagesa e rrogave të mësimdhënësve grevist.
Në një postim në rrjetet sociale, ministri i Financave Hekuran Murati shkruan se pagesa është bërë në formë të paradhënies për orët mësimore të humbura gjatë muajit shtator e të cilat do të zëvendësohen sipas kalendarit të ri mësimor të përcaktuar nga ministria e Arsimit.
Mësimdhënësit pezulluan grevën mese njëmuajshe deri në janar të vitit 2023 dhe sindikatat thanë se nuk do të heqin dorë nga kërkesa për një shtesë prej 100 eurosh deri në hyrjen në fuqi të Ligjit për pagat, i cili aktualisht është në procedurën e këshillimit publik.
Më pas ligji duhet të miratohet nga qeveria dhe Parlamenti dhe mund të hyjë në fuqi tetë muaj pas publikimit në Gazetën Zyrtare.
