Nis sot raundi i katërt i UEFA Champions League. Disa përballje fantastike do të na shoqërojnë dhe sot, përballje të cilat vendosin fatin e skuadrave në grupet përkatëse. Por fokusi kryesor do të jetë tek grupi H dhe E. Në grupin H, Maccabi përballet me Juven dhe PSG pret Benfica-n në shtëpi. Bardhezinjtë e Juves e kanë detyrim fitoren ndaj izraelitëve.
Ndërsa në grupin E, Milani pret Chelsea-n në San Siro, në një përballje direkte për vendin e parë.
Ndjekim disa nga titujt kryesorë të mediave sportive për ditën e sotme:
Mbrëmje në Champions League dhe angazhime shumë të rëndësishme për skuadrat italiane. La Gazzetta dello Sport hapet me titullin: “Europa po na thërret”. Milani përballet me Chelsean në San Siro, Pioli me Leaon janë gati për kthesën. Ndërsa Juventus, në Izrael ndaj Maccabi Haifa, duhet të fitojë me çdo kusht.
Corriere dello Sport hapet me ndeshjen vendimtare të Juventusit : “Max, ska ankime”. Për Allegrin fitorja në ndeshja e orës 18:45 ndaj Maccabit është detyrim.
“Benzema dhe dhjetë të tjerë” është titulli i gazetës AS. Madridi luan për të vulosur kalimin në një të tetën sot kundër Shakhtarit. Sevilla e Sampaolit do të kërkojë mrekullinë ndaj Dortumundit.
Mundo Deportivo fokusohet tek forma e dobët e Barcelonës në Champions: “E copëtuar”. Barça dëshiron të shfajësohet kundër Interit dhe Real Madridit duke reaguar dhe larguar dyshimet e ndeshjeve të tyre të fundit.
“Sa e vështirë është të luash kështu” ka shkruar prestigjiozja Marca. Shakhtar në tronditje nga ofensiva ruse në Ukrainë: “Ne do të duhet të gjejmë forcën për të luajtur kundër më të mirëve në botë” – u shpreh trajneri i ukrainasve.
Sport hapet me strategjinë e fundit të Barçës në tregun e transferimeve: “Objektivat në 2023, lojtarët pa skuadër. Barça dëshiron të transferojë futbollistë, kontrata e të cilëve përfundon verën e ardhshme. Messi është në listë.
Në Britaninë e Madhe, Mirror Sport nxjerr në pah ndalesën në Liverpool: “Dhimbje e kuqe. Goditje e re për Klopp me Luis Diaz të lënduar, duke krijuar një ‘vrimë’ në sulmin e Redsave.
Në Portugali, A Bola dhe sfida e luksit me PSG:“Allez Benfica Allez!” Një barazim në Paris mund të japë një shtysë të madhe për kualifikimin e Benfica-s në fazën e një të tetave.
