E moshuara e cila u dhunua brutalisht nga një infermiere e Shtëpisë së të Moshuarve në Pejë dhe u filmua rezulton se është nëna e një prej dëshmorëve të UÇK-së, Taulant Nura.
Njoftimi është bërë nga ish-ushtari i UÇK-së Adnan Hyseni dhe reperi i famshëm kosovar Gold AG të cilët e kanë konfirmuar faktin përmes rrjeteve sociale, ku gjithashtu shprehen tejet të indinjuar me ngjarjen e rëndë.
“Taulant Nuraj a na e bën hallall që ta kemi shkelë gjakun e nanën po ta rrahim veç që ka mbet pa ty”, ka shkruar në Instagram reperi.
Sakaq, mësohet se e moshuara që u dhunua nga punonjëset e qendrës “Orenda” në Pejë ka dalë nga azili.
Mediet në Kosovë bëjnë me dije se dhëndri i saj ka paraqitur para gazetarëve dokumentin të cilin e morën pasi bënë kërkesë që ajo të dalë nga aty.
Në dokument thuhet se e moshuar “tërhiqet nga Qendra për përkujdesjen e të moshuarve, Orenda” dhe se “tërheqja bëhet me kërkesë të familjarëve”.
