Detaje të rënda janë zbardhur nga rasti i rëndë i zbuluar ditën e sotëm në tiranë, ku një 52-vjeçar mbante familjen e tij të ngujuar prej 6 vitesh.
Mësohet se Xherxh (Gjergj) Laçi kishte jetuar prej disa kohësh në Itali dhe më pas është kthyer në Tiranë.
Bashkëshortja e tij kishte 6 vite që nuk dilte nga banesa, ndërkohë që dy djemtë e tyre të moshave 15 dhe 17 vjeç kanë mbaruar vetëm shkollën 9-vjeçare dhe prej një viti nuk kanë dalë fare nga shtëpia.
Kryefamiljari Laçi ishte i vetmi që dilte nga shtëpia, teksa së bashku me një të afërm u sillte ushqim.
Këto janë pamjet nga banesa, aty ku familja Laçi, mbahej e mbyllur prej 6 vitesh nga kryefamiljari. Në foto, shihet gjendja e mjerueshme në të cilën jetonte familja. Shtëpia në fund të rrugës “5 Maji” ku banonte familja me katër anëtarë, nuk kishte as drita, as ujë dhe as televizor, madje dritaret ishin të mbyllura për të mos hyrë drita.
52-vjeçari i arrestuar sot në Tiranë pasi mbante të ngujuar gruan dhe fëmijët e mitur, vuante nga çrregullime të shëndetit mendor, thonë fqinjët.
