Sot është zyrtarisht dita e fundit e ndeshjeve në nivel klubesh para nisjes së Kupës së Botës në Katar dhe disa nga skuadrat më me emër dëshirojnë që ta mbyllin sa më mirë këtë fazë.
Ndjekim disa nga titujt kryesorë të mediave sportive:
La Gazzetta dello Sport hapet me një titull kushtuar ambicieve të kuqezinjve: “Milan, formula e rikthimit”. Milan synon rikthimin tek fitorja në sfidën e sotme ndaj Fiorentinës, një skuadër e cila ka një rekord pozitiv ndeshjesh në trasfertë.
Corriere dello Sport ua kushton faqen e parë drejtuesve të Napolit: “As me Diegon”. As në kohën e Maradonës Napoli nuk u bë protagonist i një sprinti si ky i skuadrës së Spallettit.
“Juve për Allegrin dhe jo për Sarrin” ka shkruar torinezja Tuttosport, e cila hapet me një faqe të parë në temën Juve-Lazio dhe një fragment i marrë nga intervista me Paolo Di Canio, lojtar që ka luajtur për të dyja skuadrat.
Në Spanjë, AS i kushton titullin intervistës me Antonio Rudiger: “Ne duam gjashtë titujt”. Mbrojtësi gjerman ka pasur një ndikim të madh me Real Madridin dhe dëshiron të vazhdojë traditën fituese të klubit iberik.
“Luis Enrique është më i miri në botë” është titulli i katalanases Mundo Deportivo, e cila hapet me intervistën e Jordi Alba që thur elozhe për trajnerin e Kombëtares Iberike.
Marca e hap ditën gjithashtu me një titull kushtuar kombëtares spanjolle: Lewandowski: “Spanja luan bukur dhe është gjithashtu shumë efektive”. Bomberi polak beson se djemtë e Luis Enriques mund të bëjnë shumë mirë në Kupën e Botës.
