Batica më e madhe e 100 viteve të fundit nuk i bëri asnjë dëm Venecias, e kjo jo falë Zotit: pas parashikimeve për një rritje të paprecedent të ujit që do të rrezikonte ndjeshëm qytetin lagunë, në 2 të natës, autoritetet atje aktivizuan sistemin kompleks të digave, Mose dhe përpjekja e tyre, rezultoi e suksesshme.
Pa Mose-n, 82% e qytetit historik do të ishte tani nën ujë, thonë mediat vendase. Tre vjet më parë, kur sistemi nuk ekzistonte, pas një batice prej 187 centimetrash, Venecia u përmbyt thuajse e gjitha: Shtëpi e dyqanë përfunduan nën ujë, kudo shihje varka të përmbysura, të mbetura në mëshirën e dallgëve: një katastrofë, të cilës për nga niveli i dëmeve ia kalonte vetëm përmbytja e madhe e vitit 1966.
Këtë herë, masat u morën në kohë dhe Venecia ishte e mbrojtur nga sistemi i saj i digave të lëvizshme, i cili u aktivizua me urgjencë. Sistemi masiv i mbrojtjes nga përmbytja që synon forcimin e lagunës gjatë baticës së lartë u instalua më në fund tetorin e 2020-tës, megjtihate përllogaritjet e gabuara fillestare sollën vonesa në vënien e tij në funksion.
