Situata është e tmerrshme dhe kritike në qytetet në jug të Ukrainës, Kherson dhe Mykolaiv, pasi rreth 500 mijë njerëz vetëm në Mykolaiv po përballen me mungesën e ngrohjes, ujit dhe energjisë, sipas një deklarate të Organizatës të Kombeve të Bashkuara.
Zëdhënësi i OKB-së Stephane Dujarric tha se Koordinatori Humanitar Denise Brown vizitoi dy qytetet jugore gjatë fundjavës. Brown raportoi se njerëzit që ikin nga Kherson po shkojnë në Mykolaiv, sipas Dujarric.
“Janë krijuar disa qendra tashmë në Mykolaiv për të ndihmuar njerëzit që nuk mund të ngrohin shtëpitë e tyre. Punonjësit e ndihmës po ofrojnë furnizime dhe gjeneratorë për t’i bërë këto vende funksionale,” tha Dujarric.
“Furnizimi me ujë mbetet kritik, megjithëse furnizimi me energji elektrike po rikthehet gradualisht”, shtoi zëdhënësi.
Donatorët kanë dhënë 3.1 miliardë dollarë ndihmë humanitare përmes OKB-së këtë vit, por Dujarric tha se financimi i vazhdueshëm është i rëndësishëm, veçanërisht gjatë muajve të dimrit.
