Presidenti turk, Rexhep Taip Erdogan, ka folur sërish për raketën “Tajfun”, e cila sipas Erdogan do të arrijë një rreze prej 1 mijë kilometrash.
Erdogan shtoi se kjo gjë i bën grekët “të kërcejnë” nga frika.
Komentet Erdogan i bëri në deklaratat e tij në qytetin e Mardinit, para se të nisej për në Katar, ku ishte ftuar për të parë finalen e Botërorit.
Erdogan iu referua sërish raketës Typhoon dhe nuk harroi të kujtonte se turqit “mund të vijnë papritur një natë!”.
“Si po na thërrasin? Po vijnë turqit e çmendur. Sidomos për raketën Typhoon thanë se rrezja e saj arrin 560 kilometra. Patëm një takim tjetër javën e kaluar. ‘Cila është gjendja përfundimtare në të cilën jemi?’, e pyeta. ‘Do të arrijmë 1000 kilometra’, mu përgjigjën ekspertët. A nuk i bën kjo grekët të kërcejnë?’ tha presidenti turk.
“Greqia nuk duhet të ngatërrohet me ne. Ne u thamë atyre se mund të dalim nga askund një natë dhe ne mund ta vërtetojmë këtë. Nëse ata nuk pushojnë së provokuari në Egje, ne do të bëjmë gjithçka që është e nevojshme. Ne nuk kemi asnjë mosmarrëveshje me ju në Egje”, shtoi Erdogan.
Lajmin e bëjnë të ditur mediat greke, të cilat thonë se “këto deklarata vijnë pas takimit greko-turk të premten në Bruksel, në kushtet e një sekreti ekstrem mes Anna-Maria Boura, drejtoreshë e Zyrës Diplomatike të Kryeministrit Kyriakos Mitsotakis dhe Ibrahim Kalin, përfaqësues dhe bashkëpunëtor i ngushtë i Presidentit të Turqisë, Recep Tayyip Erdogan, në prani të këshilltarit diplomatik të kancelarit gjerman Olaf Scholz dhe me synimin për të hetuar synimet e të dyja palëve për një rifillim të mundshëm të kontakteve diplomatike mes dy vendeve.”
